De Ginten fan it Hilgelân

Miskien dat de measte minsken nei it Hilgelân komme foar de 'Lange Anna', de grutte 47 meter hege reade rots oan de noardwestkant fan it reade eilân. De Hilgelanners kinne de rots as Nathurn Stak ('Noarderlike Staach'; yn it Ingelsk wurdt sa'n brâningspylder  in 'sea stack' neamd). Neist de geology komme de minsken de lêste jierren ek foar de Ginten, dy't hjir heech op de reade sânstien briede, Sûnt it begjin fan de jierren '90 is de Gint hjir briedfûgel.

De Nathurn Stak, 'Lange Anna', op it Hilgelân.

Hilgelân en Düne binne no twa aparte eilannen. Troch de stoarmfloet yn de Nijjiersnacht fan 1721 naam de Noardsee in grut part fan it eilân en waard it oerbliuwende eastelike stik in apart eilân: Düne. Op de noardwestpunt fan de reade kliffen sitte de Ginten. Troch it lange skaad fan it moarnsljocht is de Lange Anna goed op de foto te finen. Foto's: Google Earth.

Kaart fan de noardwest kant fan it eilân. De measte fûgels sitte op de kliffen fan de Nuurder Moadek oant en mei de Lange Anna (27). Dizze is eins wat te fier fuort foar 'klose-ups', mar it bliuwt in ymposant spektakel. De ginten sitte boppe oan, de oare fûgels sitte in stik tichter by de see. Fan de fjoertoer (23) nei de fûgels is likernôch in kertierke rinnen. Dizze kaart stiet op in ynformaasjepaniel yn de haven.

De Buntsandstein (soms yn it Nederlânsk oerset as Bontzandsteen; Ingelsk: Bunter) is in pakket stientelagen yn de ûndergrûn fan it westen en midden fan Europa. Se bestiet út benammen sânstien, dy 't foarme waard yn it Under-Trias (Vroeg-Trias). Tegearre mei de jongere Muschelkalk en lagen fan de Keuper-Groep foarmet de Buntsandstein de saneamde Germaanske Trias, in karakteristike rige fan stientelagen yn Europa, dêr 't it tiidrek Trias nei neamd is (Trias betsjut trijedieling ). Under de Buntsandstein leit it Zechstein en der boppe leit de Muschelkalk.

Sjoch ek: de Ginten fan de Bass Rock en de foto's fan de Ginten fan Nij-Seelân.